O MISTERIO DO CALENDARIO
Venres,
27 de marzo
Mirade onde apareceu hoxe
o calendario... Claro, segue a intentar comunicarnos algo. Semella ser como a
voz da nosa conciencia que nos repite unha e outra vez o que podemos ou debemos
facer nesta situación na que nos atopamos.
Que importancia ten este
aparello nas nosas vidas!!! A gran maioría da xente xa non sería capaz de vivir
sen el. Neste momento está a ter un imprescindible papel. COMUNICÁMONOS. Si,
grazas a este trebello máxico podemos comunicarnos e saber que pasa neste mundo
máis alá das nosas catro paredes. Grazas a este trebello podemos traballar ti e máis eu, e falar ou ver á xente que queremos, ou facer a compra sen saír da casa, ou socializar un rato, evadirnos, escaparnos... e na medida do posible darlle á vida un aire de “normalidade”
que nos foi roubado por ese microscópico ser...
Sábado,
28 de marzo
Tendes idea de onde está?
Sabedes que son todos eses pequenos envases
que ten arredor? Vouvos contar un segredo de familia.
Dende moi pequeno alguén
desta familia tiña o raro costume de traer un obxecto que lle recordara os
sitios onde estiveramos de viaxe ou de vacacións. Un recordo, vamos, pero non
algo mercado, senón algo máis persoal e orixinal, significativo daqueles lugares
que algún día visitara. Como o de andar roubando non era unha opción, pois
deulle por coleccionar eses botes pequenos de xampú ou de xabón que nos deixan de
cortesía nos baños de moitos hoteis. De cada hotel onde parabamos, levaba de
recordo un deses recipientes. E pouco a pouco foi engordando a súa colección.
Hoxe, facendo limpeza no seu cuarto, atopou unha morea deles e estivemos a
adiviñar de que sitio era cada un. Foi como facer unha viaxe ao pasado, a un
pasado de goce, de risas, de ledicia, de descanso, de turismo, de sol, de neve...
que agora mesmo é imposible. Creo que o calendario nos está a recordar que máis
pronto que tarde volveremos viaxar e desfrutar fóra coa familia, que isto non vai durar
sempre... E polo contido dos botes, penso que tamén nos lembra a hixiene máxima
nestes días.
Recordade lavar as mans moitas veces no día!!!
